الشيطان يعظ
" الشيطان راجع تاني "
صحيت في يوم من نومي
وأنا في كندا علي صرخة
يقولولي قوم من نومك دا مصر فيها ثورة
خرجت جموع ملايين مظلومة ومقهورة
قاموا يهدوا فساد ويتحرروا من امنا الغولة
أنا قلت مش ممكن
طب يمكن تكون اشاعات
او حتي دي مبالغة
قلبت في القنوات ودخلت علي الشبكات وبقيت اسمع النشرات
بيقولوا أحتجاجات ومظاهرات قلبت علي ثورة
فلما أنا بصيت علي كل أخبارها
وبقيت أحلل الأحداث وتطويرها
ولقيت المتبرجات تصُب للمسلم لأجل ما يتوضي
والمسيحي بيحاوطه وهو بيصلي لأجل ما يتأذي
والمسلم يقيد شمعه جنبه في القداس
والسلفي أبو لحية بيدندن أغاني في وسط الناس
وياما قالوا علي الثورة والثوار
ودول خونه وماشيين مع الاشرار
واللي بيشتمهم واللي بيلعنهم
واللي يقول قيدوا فيهم النار
والعسكري المغوار
بيضرب عليهم نار
وهو يقول سلمية سلمية .......
دا انا مصري وبحبك
بس تقول لمين أصل البعيد حمار
*.-.*.-.*
دا المصري والله غريب
ومش زي باقي الخلق
دا انا كنت سايبه مريب
ويقلب الباطل حق
وكنت سايبه جاهل
فاسد فساد كامل
وفي خوفه كان خامل
ولا يقدر يقول الــ لأ
هتقولي حصله ايه
اقولك أصله مصري ومش زي باقي الخلق
*.-.*.-.*
علم وحضارة جدود
أصالة وتراث موجود
عليهم تراب الزمان
هو انا ما قلتلكش كمان
ان المصري علي التراب مولود
وخلاص تحس أن التراب يسود
فينتفض انتفاضة فهود
يبنوا في لحظه سدود
واهرامات وعمود
وفي حروبهم اسود
وفي لحظة يقوم بثورة
لا ليها شبة و لا حدود
لا تقولي بيض ولا سود
ولو هتقوله حاسب
يقولك قدها وقدود
وتلاقي في أيده عود
فيهزمك بكلامه
ومواويله وألحانه
تقولش قنبلته دي غنوة
وزئيره بيحمي اوطانه
*.-.*.-.*
بس مش متخيل انه في يوم يفوق من الغيبوبه
أصل الظلم دا كان عندهم سبوبه
وبيت الفساد كامل .. مش ناقصه ولا طوبه
والنفاق وصل لمداه في وشك يا حبوبه
ويادوبك تلتفت دي عايبه ومعيوبه
وفجاءة بقيت انا عاطل وأجرتي محسوبه
أصلي كنت ظابطها لعبه وملعوبه
ومامشيتشي إلا لما أتأكدت أنها بقيت مقلوبه
وقلت أجيلكوا بلادكوا
اموت في ضمايركوا
وفي السرقة اساعدكوا
وأقلب ليكوا حالكوا
وأخليكوا زي مصر مسروقه ومنهوبه
بس خلاص يا كندا أنا راجع علي مصر من تاني
قبل ما يتخلصوا من كل أذنابي
هرجع وأشعللها ومعايا أعواني
من أمن دولتها وحزبها الفاني
ودول بقي في الظلم والخراب والوسوسه
خلوني بقيت تلميذ......... وحزبهم مدرسه
*.-.*.-.*
أهدي يا ثورة حبه
بصي فوق دا أيه ........... دا أستفتاء
ودي اول ضربه وخليتهم بقو أعداء
ايه ........... أنت بتقول ايه
بقولكم دا أستفتاء
بتقولوا ولعتوها والعركه منصوبه
وناس كمان بتموت ضاربه ومضروبه
يا غبي هد كنيسة او جامع علي كام ضريح
نار الفتنه تقيد وبالثورة تطيح
هتظبط انت حالك في جو هدوء ومريح
وتطلعلك بكام تصريح
وتغير في الوشوش
وتمحي كل سرقة وتعدل المغشوش
وتوه كل مالك مابين كروش وعروش
ولما يبقوا يفوقوا للثورة والتفتيش
هيسألوك شفته
أقولهم ماشفتوش
طب تعرفه
قولهم ما اعرفوش
ودايما تبقي راسي
ووشك يبقي بشوش
يقولوا طب وانت عملت ايه
قولهم أصلي كنت بحوش
ولوقفلت معاك هتقولهم ايه
لو عاوزين تفتشوني متستنوش
" فتشني فتش "
بقلم
حامد المسلمي
ليست هناك تعليقات:
إرسال تعليق