عشانك يا مصر
عشانك يا مصر خرجنا
لأجل عيونك نثور
حتي لو كنتي أسيا
ومسكنانا قبور
وهتافنا كان سلمية
لا دمار ولا حرامية
طالبين عدالة اجتماعية
نعيش بكرامة وحرية
وفتح زهرة شبابك
قدام ديوانك وبابك
يغذي بدمه فؤادك
ويزيل ضباب السنين
وأرجع وأقول سلمية
ألقي حكومة غبية
ترهبنا ببلطجية
فاكرين هنرجع نخاف
دا أبنك ياما شاف
ودقت ع الراس طبول
عشانك يا مصر خرجنا
لأجل عيونك نثور
حتي لو كنتي أسيا
ومسكنانا قبور
وقالوا علينا قلة.... ومندسه
واللي وراهم ناس منساقه...... ومش حاسه
بكنتاكي ويورو ضحكوا عليكو ....الساسه
بيشوهوا في صورتنا بغباوة ......وبخسه
فاكرينا كما الأنعام
ناكل نقوم وننام
مش فاهمين أن اللي مات
أختار يموت أنسان
تاريخ جديد وأتكتب
بحضارة راقية وأدب
دا أنا مصري وليا العجب
لما أنام أو أثور
عشانك يا مصر خرجنا
لأجل عيونك نثور
حتي لو كنتي أسيا
ومسكنانا قبور
بقلم
حامد المسلمي
